(Oktyabr ayınıń sońǵı ekshembisi mámleketimizde "Avtomobil transportı xızmetkerleri kúni" dep belgileniwi múnásibeti menen)

Tariyxıń baslanar jániwar attan,
Tabanlap, tiresip arbanı tartqan,
Seyil etip, malikalar unatqan,
Tariyxıń teberik avtomobiller.

Dáslep úsh dóńgelek, sıńǵırlap jolda,
Eplep, el kúshine jaraǵan olda,
Mingen kewli tasıp, quwanıp sonda,
Batista tuwılǵan avtomobiller.

Áwel quwat aldıń qaynaǵan puwdan,
Alımlar izlenip, jańalıq quwǵan,
Kúshli paroxodlar júzedi suwdan,
Túp-tiykarı óziń, avtomobiller.

Jaralǵansań adam ushın, júk ushın,
Qabıllap ózińe, ilimniń kúshin,
Iyelep dunyanıń, búgin tórt mushin,
Jer álemin gezgen avtomobiller.

Jollar abat boldı qádemiń tiyip,
Orpań topıraqtı, tas, maylar súyip,
Xızmetin dim ulli, márteben biyik,
Xalqıma qádirli avtomobiller.

Polat qollar, basqaradı ózińdi,
Olar joldas etken, sabır-tózimdi,
Jańalıqlar quwantadı kózimdi,
Elektrge ótken avtomobiller.

Tas jollarda, tulpar bolıp jelesiz,
Jol belgisi, tártibine kónesiz,
Hátteki, esikke shekem kelesiz,
Xızmetiń dım ullı avtomobiller.

Ruldı basqarǵan qollar talmasın,
Tártip buzıp, hesh uyalıp qalmasın,
Jáhánde shofyorlar dańqı jańlasın,
Jollarǵa jarasın, avtomobiller.

Rawaj Otarbaev.
Ózbekstan Jazıwshılar awqamı aǵzası, shayır.
24.10.2025.