Nókis qalasında Qaraqalpaqstan Respublikası Transport ministri P.Kayıpbekov hám Transport qadaǵalaw inspekciyasınıń baslıǵı J.Karimov qatnasıwında  jolawshı tasıw tarawında jumıs alıp barıp atırǵan isbilermenlik subektleri menen kóshpeli qabıllaw bolıp ótti.

Ushırasıwdıń tiykarǵı maqseti - transport tarawında jumıs alıp barıp atırǵan isbilermenlerdi qollap-quwatlaw, olarda dus kelip atırǵan mashqalalardı ornında úyreniw hám unamlı sheshiwden ibarat boldı. Kóshpeli qabıllawda Qaraqalpaqstan Respublikasınıń túrli rayon hám qalalarınan kelgen jolawshı tasıw xızmetin kórsetiwshi isbilermenler qatnastı.

Inspekciya baslıǵı isbilermenlerdiń múrájatların dıqqat penen tıńlap, hár bir másele boyınsha anıq ilajlar belgilep ótti. Taraw jumısında ashıq-aydınlıqtı támiyinlew, korrupciyaǵa qarsı sistemalı gúresiw, isbilermenlerdiń huqıqıy kepilliklerin kúsheytiw hám mámleketlik qadaǵalawdı sanlastırıw zárúrligi hám bul baǵdarda baslanǵan unamlı jumıslar turaqlı dawam ettiriletuǵını atap ótildi.

Sonıń menen birge, isbilermenlik subektleriniń wákilleri ámeldegi nızamshılıqqa, tender jáne licenziya talap hám shártlerine qatań ámel etken halda óz jumısın ámelge asırıwǵa shaqırıldı. Atap ótiliwinshe, bul normalarǵa ámel etiw tek ǵana tarawdıń turaqlılıǵın támiyinlep qoymastan, al hadal báseki hám sapalı xızmet kórsetiwge tiykar jaratadı.

Kóshpeli qabıllaw ashıqtan-ashıq sóylesiw hám nátiyjeli dodalaw ruwxında ótti. Ushırasıw juwmaǵında bir qatar máseleler ornında sheshildi, isbilermenlerdiń nızamlı talapların qanaatlandırıw boyınsha anıq tapsırmalar berildi. Qalǵan múrájatlar boyınsha juwapkerlerge anıq wazıypalar júklendi hám orınlanıwı qatań qadaǵalawǵa alındı.