Germaniyanıń xalıqaralıq kásiplik bilimlendiriwdi rawajlandırıw shólkemi "AVESTOS INTERNATIONAL" GmbH usı jıldıń 24-26-aprel kúnleri Qaraqalpaqstan Respublikası Nókis qalasına xalıqaralıq bilimlendiriw baǵdarlamaların engiziw maqsetinde bardı.

Sapar etiw dawamında Qaraqalpaqstan Respublikası Kásiplik bilimlendiriw agentligine qaraslı Nókis aldıńǵı kásiplik sheberlik texnikumı menen birgelikte Germaniyanıń zamanagóy kásiplerin nemis standartları talaplarına muwapıq oqıtıw imaratı obektleri birgelikte tallandı.

Germaniyadan kelgen "AVESTOS INTERNATIONAL" shólkeminiń basshısı Klaus Michel hám shólkemniń ekspertleri tárepinen olar tárepinen engizilip atırǵan 3 kásip boyınsha usınıs hám sóylesiwler alıp barıldı.

Xalıqaralıq ekspertler menen Qaraqalpaqstan Joqarǵı Keńesi sanaat, qurılıs, transport hám málimleme texnologiyaları máseleleri komitetiniń baslıǵı I.Niyazov, Qaraqalpaqstan Respublikası Kásiplik bilimlendiriw agentliginiń direktorı A.Ayapov, Nókis aldınǵı kásiplik sheberlik texnikumınıń direktorı S.Aybergenov hám pedagog kadrları, Respublikadan kásiplik bilimlendiriwdi rawajlandırıw bas qánigesi Q.Rwzmatov hám qurılıs jumısları boyınsha qurılısshı qánigeleri menen usı jılı 3 zamanagóy kásiplerdi 2026/2027-oqıw jılına engiziw ushın tayarlıq jumısların muwapıqlastırıwǵa eristi.

Esletip ótiw orınlı, bul xalıqaralıq shólkem Ózbekstan Respublikası kesiminde usı jılı 7 wálayatta dual bilimlendiriw sistemasında jáhán standartları hám talaplarına juwap beretuǵın maqsetli jas kadrlardı jetistiriwge kirisken.

Nókis aldınǵı kásiplik sheberlik texnikumı bul joybar ishinde 3 kásip, yaǵnıy "Qurılıs jumısları" tarawında 2 baǵdar hám "Metallarǵa islew beriw" kásiplerin engiziw menen qatnaspaqta.

Keleshekte usı texnikum menen túrles kásiplerdi úzliksiz oqıtıw rejeleri de belgilep alındı.