Ózbekstan Respublikası Transport ministriniń birinshi orınbasarı M.Omarov, Qaraqalpaqstan Respublikası Joqarǵı Keńesiniń komitet baslıǵı I.Niyazov hám Qaraqalpaqstan Respublikası Ministrler Keńesi baslıǵınıń orınbasarı T.YUsupov, Qaraqalpaqstan Respublikası Transport ministri B.Seytmuratovtıń qatnasıwında Qaraqalpaqstan Respublikasında jolawshı tasıw jumısı menen shuǵıllanıwshı kárxanalardıń wákilleri menen ushırasıw ótkerildi.

Ushırasıwda Nókis qalasınıń Bas rejesi sheńberinde islep shıǵılǵan jámietlik transporttıń jańa jónelisler tarmaǵı hár tárepleme dodalanıp, tasıwshılardıń pikir-usınısları tıńlandı.

Sóylesiw dawamında jámietlik transport jónelislerin brutto-shártnama tiykarında shólkemlestiriwdiń abzallıqları haqqında da sóz etildi. Atap aytqanda, bul sistema qatnawlardıń turaqlılıǵın támiyinlew, xızmet sapasın arttırıw, tasıwshılar ushın turaqlı qarjılandırıw mexanizmin qáliplestiriw hám xalıqqa qolaylı hám isenimli transport xızmetlerin kórsetiwge xızmet etiwi atap ótildi.

Sonday-aq, ushırasıwda isbilermenler tárepinen kóterilgen jolawshı tasıw tarawındaǵı mashqalalı máseleler juwapkerlerdiń qatnasıwında hár tárepleme dodalandı. Olardıń ayırımları ornında sheshildi, qosımsha waqıt hám úyreniwdi talap etetuǵın máseleler bolsa tiyisli tártipte kórip shıǵıw ushın qadaǵalawǵa alındı.

Ushırasıw juwmaǵında isbilermenler menen ashıqtan-ashıq sóylesiwdi dawam ettiriw, olardıń usınısların inabatqa alıw jáne bar mashqalalardı basqıshpa-basqısh sheshiw boyınsha tiyisli ilajlardı kóriw belgilep alındı.