Bul iri kárxana Prezidentimizdiń 2024-jıl 28-iyundegi qusshılıq tarawın qollap-quwatlawǵa baylanıslı qararı tiykarında shólkemlestirildi. Joybardıń ulıwma bahası 7,8 million dollardı quraydı. 21 gektar maydandı ielegen kárxananıń iske qosılıwı menen 70 jergilikli xalıq turaqlı jumıs ornına ie boldı.

 Kárxananıń óndirislik quwatlılıǵı joqarı bolıp, 200 mıń tawıq baǵıw imkaniyatına ie. Házirgi kúnde bul jerde 130 mıń tawıq tárbiyalanbaqta. Kárxana mámleketlik byudjetke 4,8 milliard sum túsim keltirip, rayon ekonomikasına úlken úles qospaqta.

 Komplekste jılına 27,5 million dana inkubaciyalıq máek jetistiriledi. Bul máekler tawıq hám 1 kúnlik shóje halında satıwǵa shıǵarıladı.

 Búgin Kegeylide mine usınday zamanagóy kompleks qurılǵanı jaqsı nátiyje ekeni atap ótildi. Bunday joybarlar tek ǵana ónimleriniń ózine túser bahası emes, bálki aymaqtıń azıq-awqat qáwipsizligin támiyinlewde áhmietli ekenine itibar qaratıldı.

 Tawıqlardı sapalı azıqlıq penen támiyinlew máselesi de kárxananıń ózinde sheshilgen. Bul jerde sutkasına 100 tonna jem islep shıǵarıw quwatlılıǵına ie bolǵan óz aldına zavod qurılǵan. Óndiris processleri tolıq avtomatlastırılǵan.

 Burın Qaraqalpaqstanǵa tawıq hám máek ónimleri mámleketimizdiń basqa aymaqlarınan alıp kelinetuǵın edi. Kegeyli rayonında jumıs baslaǵan bul kárxana Aralboyı aymaǵınıń bul ónimge bolǵan talabın qanaatlandırıp ǵana qalmastan, ónimdi sırt elge de eksport etpekte.

 Usı jıldıń sentyabr ayına shekem Awǵanstanǵa 1,1 million dollarlıq ónim eksport etildi. Jıldıń aqırına shekem eksport kólemin 1,5 million dollarǵa jetkeriw rejelestirilgen.

Usı jıldıń aqırına shekem jáne 8,5 gektar maydanda bahası 5 million dollarlıq jańa fabrikanı iske qosıw mólsherlengen. Joybar ámelge asırılǵannan soń, jańa jumıs orınları jaratıladı hám óndiris kólemi jáne de artadı.

Prezidentimiz bunday kompleksler keleshekte iri qusshılıq xoldinglerine aylanıp, tek ǵana jańa emes, al joqarı dáramatlı jumıs orınların jaratıwǵa xızmet etiwi kerek ekenligin atap ótti, juwapkerlerge bul boyınsha tiyisli kórsetpeler berdi.