Jáhán tájiriybesinde avtomobil islep shıǵarıwshı kompaniyalar basqa tarmaqlardı da rawajlandırıp, kóp tarmaqlı jumıs alıp barıwı keń tarqalǵan. Jizzaq wálayatında avtomobil islep shıǵarıp atırǵan "ADM Group" kompaniyası da usı qatnas tiykarında jumısın keńeytpekte. Aralboyında intensiv baǵshılıqtı rawajlandırıw onıń jańa baǵdarlarınan biri boldı.

Aytıwlarına qaraǵanda, Aralboyınıń qıyın klimatında, shor topıraǵında baǵshılıq ózin aqlamaydı. 55 milliard sum qarjı qaratılǵan bul joybar bolsa bul kózqaraslardı pútkilley ózgertip atır.

Baǵdıń ulıwma maydanı 330 gektardı quraydı. Eń áhmietlisi, jergilikli xalıq ushın 100 turaqlı jumıs ornı jaratıldı. Burın turaqlı dáramat dáregine ie bolmaǵan awıl xalqı endi óz aymaǵında islep, shańaraǵına bereket baǵıshlamaqta.

 Házirgi waqıtta 69 gektar maydanǵa AQShta selekciya etilgen 250 mıń túp qara qáreli náli egilgen. Bul sort shor jerlerge júdá shıdamlı esaplanadı. Ol egilgeninen soń tek 2 jılda ónimge kiredi. Bir túp terek 50-60 kilogrammǵa shekem ónim beredi. Miyweniń iriligi hám dánesiniń ańsat ajıralıwı qayta islew ushın júdá qolaylı esaplanadı.

 Jerden únemli paydalanıw hám dáramattı kóbeytiw maqsetinde terekler arasına ónimdarlı pomidor sortı egildi. Egislik maydanınıń hár bir gektarınan ortasha 40-45 tonna ónim alıw múmkin.

 Baǵda qollanılǵan zamanagóy texnologiyalar suw jetispewshiligi menen baylanıslı mashqalaǵa nátiyjeli sheshim berdi. Maydanda jabıq drenaj hám tamshılatıp suwǵarıw sistemaları engizilgen. Ápiwayı suwǵarıwda bir gektar jerge 12 mıń litr suw ketedi. Jańa sistema arqalı bolsa bul jumsaw tek ǵana 5 mıń litrdi quramaqta. Nátiyjede suw 60 procentke shekem únemlenedi.

 Suw tikkeley terektiń tamırına baradı hám biykarǵa jumsalmaydı. Suw menen birge berilgen mineral tóginler 90 procentke shekem ósimlik tárepinen ózlestiriledi. Íǵallıqtıń bir qálipte saqlanıwı ónimdarlıqtı jáne de arttıradı. Sistema tolıq avtomatlastırılǵanı sebepli júzlegen gektar maydandı bir operator biymálel basqara aladı. 

Klimattıń qıyınshılıqlarına qaramastan, usınday zamanagóy baǵ jaratılǵanı isbilermenlerimizdiń mártligi hám jańasha pikirleytuǵınınan dárek ekeni atap ótildi.

Miyweni usı jerdiń ózinde keptiriw hám qayta islew úskeneleriniń ornatılǵanı ónimniń bahasın bir neshe esege arttırıp atırǵanı atap ótildi.

 Joybar sheńberinde tayar ónimlerdi satıw boyınsha da anıq reje bar. Eksport boyınsha Qıtay, Koreya hám Rossiya mámleketleri menen paydalı shártnamalarǵa qol qoyılıp bolǵan.

Kegeylidegi bul tabıslı tájiriybe pútkil Qaraqalpaqstan boylap keńeytiledi. Intensiv baǵlardıń maydanın 10 mıń gektarǵa jetkerip, 40 mıń turaqlı hám máwsimlik jumıs orınların jaratıw názerde tutılǵan.

 Bul jerde mámleketimiz basshısı fermerler menen sóylesti. Olar mámleketimizde ámelge asırılıp atırǵan reformalardı ayrıqsha atap ótip, Qaraqalpaqstan rawajlanıwına qaratılıp atırǵan turaqlı itibar ushın minnetdarshılıq bildirdi.