"Qala jolawshı transportı sistemasın bunnan bılay da jetilistiriw boyınsha qosımsha ilajlar haqqında"ǵı Húkimet qararı qabıl etildi. (No 276, 03.06.2026-jıl.)

Qararǵa bola, aydawshı menen birge 60 adam yamasa onnan artıq adamdı tasıwǵa mólsherlengen, "Evro-5" hám onnan joqarı ekologiyalıq kategoriya talaplarına sáykes keletuǵın M3 kategoriyadaǵı (III klassqa tiyisli bolmaǵan) jańa transport quralların (avtobus/elektrobus yamasa trolleybuslar) 2027-jıl 31-dekabrge shekem Ózbekstan Respublikasına import etiwde utilizaciya jıyımınıń nollik stavkası qollanıladı.

Brutto-shártnama tiykarında shólkemlestirilgen turaqlı qala avtobus jónelislerinde túsimlerdiń tolıqlıǵın támiyinlew maqsetinde, 2026-jıl 1-sentyabrden baslap tómendegi tártip engiziledi;

 jolawshı tárepinen jol haqı avtomatlastırılǵan tólem sisteması terminalları (validatorlar) menen úskenelengen avtobusqa miniw waqtında tómendegi usıllar arqalı ámelge asırıladı:

transport kartasın validatorǵa tiygizgen halda onı validalaw;

bank kartası, smartfon hám basqa kontakcız elektron tólem túrlerinen paydalanıw (NFC, QR, Biometric, BLE, UWB hám basqa engizilip atırǵan texnologiyalar járdeminde tólew);

sociallıq/transport kartasın validatorǵa tiygizgen halda jeńilletilgen yamasa biypul júriw huqıqın tastıyıqlaw.

jolawshı jol haqı usı bántte názerde tutılǵan usıllar arqalı avtobusqa miniw waqtında tólenbegende (tastıyıqlanbaǵanda), jolawshı avtobusta biletsiz júrgen dep esaplanadı.

Usı qarar menen Ózbekstan Respublikası Húkimetiniń ayırım qararlarına ózgerisler hám qosımsha kirgiziledi:

Atap aytqanda, qala shetinen 5 km ge shekem yamasa belgilengen tártipte tastıyıqlanǵan qalalardıń transport hám jol-transport infrastrukturasın rawajlandırıw bas rejelerine muwapıq kóbi menen 12 km ge shekem shetke shıǵatuǵın jónelisler de endigiden bılay qala avtobus jónelisleri esaplanadı;

Transport ministrligi tiyisli ministrlikler hám uyımlar menen birgelikte usı jıldıń 1-sentyabrine shekem paytaxt jámietlik transportı hám qala átirapı temir jol qatnawlarında jol haqısın tólewdiń integraciyalasqan sistemasın, sonıń ishinde, "elektropoezd-avtobus" hám "elektropoezd-metro" tartımlı tarif rejelerin engizedi.