Korrupciya - bul tek ǵana jınayat emes, al jámietti ishten jemiriwshi, demokratiya hám huqıq ústinligine zıyan keltiretuǵın, turaqlı rawajlanıwǵa tosqınlıq etetuǵın eń qáwipli sociallıq illet. Korrupciya bar bolǵan jámiette nızam ústinligi ázzilesedi, teńlik buzıladı, hadal miynet qádirsizlenedi. Búgingi kúnde korrupciya tek ǵana milliy emes, al xalıqaralıq mashqalaǵa aylanǵan.
Ol ekonomikalıq rawajlanıwǵa tosqınlıq etedi, investiciyalıq ortalıqtı tómenletedi, sociallıq ádalacızlıqtı kúsheytedi. Sol sebepli korrupciyaǵa qarsı gúresiw hár bir mámleket ushın strategiyalıq wazıypaǵa aylanǵan.

Ózbekstanda sońǵı jıllarda Korrupciyaǵa qarsı gúresiw mámleketlik siyasattıń tiykarǵı baǵdarlarınan birine aylandı. Bul baǵdarda keń kólemli huqıqıy hám institucionallıq reformalar ámelge asırılmaqta. Korrupciyaǵa qarsı gúresiwdi tártipke salatuǵın arnawlı nızamshılıq bazası qáliplestirilip, mámleketlik uyımlardıń jumısında ashıq-aydınlıqtı támiyinlew, mámleketlik xızmetlerdi sanlastırıw arqalı insan faktorın azaytıw ilajları kórilmekte.

Korrupciyanıń aldın alıw hám oǵan qarsı gúresiw tarawındaǵı mámleketlik siyasattı izbe-iz dawam ettiriw, elimizdiń xalıqaralıq reyting hám indekslerdegi poziciyasın bunnan bılay da jaqsılaw jáne Ózbekstan Respublikası Korrupciyaǵa qarsı gúresiw agentliginiń jumısın jańa basqıshqa kóteriw maqsetinde Ózbekstan Respublikası Prezidentiniń 2025-jıl 30-dekabrdegi "Ózbekstan Respublikasında Korrupciyanıń aldın alıw hám oǵan qarsı gúresiw sistemasın bunnan bılay da jetilistiriw haqqında"ǵı PP-270-sanlı Pármanı qabıl etildi.

Usı Pármanǵa muwapıq mámleketlik uyımlar hám shólkemler, ustav kapitalında mámleketlik úlesi 50 procent hám onnan artıq bolǵan xojalıq jámietlerinde korrupciyaǵa qarsı gúresiwdiń professional hám nátiyjeli sistemasın shólkemlestiriw; korrupciya aqıbetleri menen gúresiwden kóre korrupciyalıq faktorlardı erte anıqlaw hám preventiv mexanizmlerdi engiziw arqalı sistemalı korrupciyalıq jaǵdaylardıń aldın alıw; sanlı texnologiyalar, sonıń ishinde, jasalma intellektti engiziwdi hám olardan nátiyjeli paydalanıwdı keńeytiw; mámleketlik uyımlar hám shólkemlerdiń jumısında ashıq-aydınlıq siyasatın izbe-iz dawam ettiriw hám turaqlı jetilistirip barıw korrupciyanıń aldın alıw hám oǵan qarsı gúresiw tarawındaǵı mámleketlik siyasattı sapa jaǵınan jańa basqıshqa kóteriwdiń 2030-jılǵa shekemgi tiykarǵı baǵdarları etip belgilendi.

Sonday-aq, Ózbekstan Respublikası Prezidentiniń 2025-jıl 30-dekabrdegi PP-270-sanlı Pármanı, 2021-jıl 6-iyuldegi PQ-5177-sanlı "Korrupciyaǵa qarsı gúresiw jumısın nátiyjeli shólkemlestiriwge baylanıslı qosımsha ilajlar haqqında"ǵı qararına muwapıq Ózbekstan Respublikası Korrupciyaǵa qarsı gúresiw agentligi direktorınıń 2026-jıl 28-marttaǵı 84-sanlı Buyrıǵı menen "Korrupciyaǵa qarsı ishki qadaǵalaw bólimleri jumısı haqqında"ǵı Úlgi reje tastıyıqlanǵan. Usı Úlgi reje mámleketlik uyımlar hám shólkemler, ustav kapitalında mámleketlik úlesi 50 procent hám onnan artıq bolǵan xojalıq jámietlerinde korrupciyaǵa qarsı ishki qadaǵalaw bólimleriniń maqseti, wazıypaları, funkciyaları, huqıq hám minnetlemeleri jáne olardıń jumısın shólkemlestiriw tártibin belgileydi.

Juwmaqlap aytqanda Korrupciya - jámiettiń rawajlanıwına qarsı eń qáwipli illet, ol quramalı hám kóp qırlı sociallıq hádiyse bolıp, oǵan qarsı gúresiw tek ǵana jazalaw menen emes, al sistemalı reformalar, huqıqıy mádeniyat hám ashıq-aydınlıqtı támiyinlew arqalı nátiyjeli boladı. Ózbekstanda bul baǵdarda ámelge asırılıp atırǵan reformalar jámiette korrupciyaǵa mawasasız múnásibetti qáliplestiriwge hám turaqlı rawajlanıwǵa tiykar jaratpaqta.

 Qaraqalpaqstan Respublikası

hákimshilik sudınıń

sudya aǵa járdemshisi                                                                      Z.Raimova