Nızamshılıqta hayal-qızlar hám balalar mámleket tárepinen ayrıqsha qorǵalatuǵın sociallıq ázzi kategoriya sıpatında tán alınǵan. Olardıń huqıqları, erkinlikleri hám nızamlı máplerin támiyinlew mámleketlik siyasattıń tiykarǵı wazıypalarınan biri sıpatında belgilengen.

         Ózbekstan Respublikası Konstituciyasında insannıń abırayı hám qádir-qımbatına qol qatılmaslıǵı bekkemlengen. Sonday-aq, "Hayal-qızlardı kúsh kórsetiw hám zorlıqtan qorǵaw haqqında"ǵı jáne "Balalardı zorlıqtıń barlıq túrlerinen qorǵaw haqqında"ǵı nızamlar hayal-qızlar hám balalardı zorlıqtan qorǵawdıń anıq huqıqıy tiykarların belgilep berdi.

Bul nızamlardı ámeliyatqa engiziw maqsetinde Ministrler Kabinetiniń bir qatar qararları qabıl etilip, zorlıq jaǵdayların anıqlaw, bahalaw hám jábirleniwshilerdi qorǵaw tártip-qaǵıydaları engizildi. Atap aytqanda, qorǵanıw orderi institutı hayal-qızlar hám balalardı jedel qorǵaw, zorlıqtıń tákirarlanıwınıń aldın alıwǵa xızmet etpekte.

Sonday-aq, balalarǵa qarata zorlıq jaǵdayların erte anıqlaw, qáwip dárejesin bahalaw hám individual qorǵaw rejelerin islep shıǵıwǵa qaratılǵan jańa tártipler engizildi. Bul qatnas bala máplerin ústin qoyıw principin ámeliyatta támiyinlewge qaratılǵanı menen áhmietli bolıp esaplanadı.

Búgingi kúnde Ózbekstanda zorlıqqa qarsı mámleketlik siyasat tek ǵana jaza ilajları menen sheklenip qalmastan, profilaktika, erte anıqlaw hám jábirleniwshilerge kompleksli járdem kórsetiwdi óz ishine aladı.

Prezident pármanı menen tastıyıqlanǵan 2026-2030-jıllarǵa mólsherlengen balalardı zorlıqtıń barlıq túrlerinen qorǵaw strategiyası bolsa bul tarawdaǵı mámleketlik siyasattı jańa basqıshqa alıp shıqtı.

Ózbekstanda engizilgen qorǵaw orderi, arnawlı járdem orayları hám reabilitaciya xızmetleri mazmunı jaǵınan áne usı aldınǵı qatnaslar menen únles bolıp esaplanadı. Házirgi waqıtta máhálle, bilimlendiriw, densawlıqtı saqlaw hám huqıq qorǵaw uyımları arasındaǵı birge islesiwdi jáne de kúsheytiw arqalı erte anıqlaw hám profilaktika jumısları keńeytilmekte.

Ózbekstanda hayal-qızlar hám balalardı zorlıqtan qorǵaw boyınsha bekkem huqıqıy hám institucionallıq baza jaratıldı. Qorǵaw orderi, arnawlı járdem orayları, profilaktika hám reabilitaciya mexanizmleri mámlekettiń insan máplerine baǵdarlanǵan kompleksli siyasat alıp barıp atırǵanın kórsetedi.

Mámleketimiz basshısınıń atap ótkenindey, hayal-qızlar hám balalardıń qáwipsizligi jámiet turaqlılıǵınıń áhmietli shárti bolıp esaplanadı. Bul baǵdardaǵı reformalardı izbe-iz dawam ettiriw, jámiette zorlıqqa qarsı qatnastı bekkemlew Jańa Ózbekstannıń rawajlanıwınıń áhmietli faktorı bolıp qaladı.

Qaraqalpaqstan Respublikası

Hákimlik sudınıń

sudya aǵa járdemshisi                                                            G.Jollıbaeva