Elimizde jaslarǵa bolǵan itibar jáne qollap-quwatlaw jıl sayın kúsheyip barmaqta. Ásirese, hár hápteniń peyshembe kúnin “Jaslar kúni” etip belgileniwi arqalı jas áwladtıń bos waqıtın mazmunlı ótkeriwine, olardıń bilim alıwına, sport penen shuǵıllanıwına hám jámiyetlik islerde belsendi qatnasıwına keń múmkinshilik jaratılmaqta.

Búgingi kúnde ótkerilip atırǵan “Jaslar kúni” ilajları jaslardı birlestiriwshi, olardıń talantın ashıwshı hám keleshekke bolǵan isenimin arttırıwshı áhmiyetli platformaǵa aylanbaqta. Hár peyshembe kúni qalada túrli mádeniy-ruwxiy ushırasıwlar, sport jarısları, kitap oqıw keńesleri, seminar-treningler hám jaslar menen ashıq sáwbetler shólkemlestirilmekte.

Sonday-aq, “Jaslar kúni” sheńberinde transport, ekologiya, sanlı texnologiyalar, isbilermenlik hám sport tarawlarında da arnawlı ushırasıwlar ótkerilip, jaslardıń oy-pikirleri tıńlanadı. Bul bolsa olardıń jámiyet turmısındaǵı ornın jáne de arttıradı.