Ózbekstan Respublikası Prezidentiniń 2023-jıl 16-maydaǵı PQ-158-sanlı "Ózbekstan Respublikası xalqı hám aymaǵınıń seysmikalıq qáwipsizligin támiyinlew sistemasın bunnan bılay da jetilistiriwge baylanıslı qosımsha ilajlar haqqında"ǵı qararı, Ózbekstan Respublikası Bas ministriniń 2024-jıl 1-noyabrdegi 182-sanlı bildiriwi hámde Transport ministrliginiń 2026-jıl 15-oktyabrdegi 10577-sanlı rezolyuciyasında belgilengen wazıypalardıń orınlanıwın támiyinlew, xalıqtıń jer silkiniwge tayarlıǵın arttırıw, ayrıqsha jaǵdaylar júz bergende durıs háreket etiw kónlikpelerin qáliplestiriw hám transport infrastrukturası obektlerinde qáwipsizlikti támiyinlew maqsetinde, "Xalıqtı jer silkiniwge tayarlaw hápteligi" sheńberinde Qaraqalpaqstan Respublikası Transport ministrliginde seminar ótkerildi.

Seminar dawamında mákeme xızmetkerleri, jolawshılar hám xalıq arasında jer silkiniw waqtında hám onnan keyin durıs háreketleniw, qáwipsiz orınlarǵa shıǵıw, evakuaciya tártibi jáne jábirlengenlerge birinshi járdem kórsetiw boyınsha úgit-násiyat jumısları alıp barıldı.

Sonday-aq, imaratlar hám tiyisli obektlerde xızmetkerlerdiń qatnasıwında jer silkiniw waqtında qáwipsiz háreketleniw, imaratlardı tárk etiw hám belgilengen jıynalıs orınlarınan shıǵıw tártibi boyınsha instrukciyalar hám ámeliy shınıǵıwlar ótkerildi.

Sonıń menen birge taraw qánigeleri tárepinen xalıqtıń jer silkiniwge tayarlıǵın arttırıw, ayrıqsha jaǵdaylar júz bergende durıs háreket etiw kónlikpelerin qáliplestiriw maqsetinde tayarlanǵan video rolikler avtovokzal hám avtobuslardıń monitorlarına jaylastırıldı.