Qarar tiykarında alıs aymaqlardaǵı xalıqtı jámiyetlik transport xızmeti menen támiyinlew hám jámiyetlik transport jónelisleri tarmaǵın keńeytiw maqsetinde Qaraqalpaqstan Respublikasındaǵı rayon orayların alıs aymaqlar menen baylanıstıratuǵın qala átirapı, qalalararalıq mikroavtobus jónelislerinde kórilgen zıyanlardı qaplap beriw názerde tutılǵan.

Bunda Qaraqalpaqstan Respublikası Ministrler Keńesi tárepinen hár jılı 1-yanvarǵa shekem Qaraqalpaqstan Respublikasında rayon orayların alıs aymaqlar menen baylanıstıratuǵın rentabelsiz turaqlı mikroavtobus jónelisleriniń dizimi tastıyıqlanadı.

Al,Transport ministrligi Sanlı texnologiyalar ministrligi menen birgelikte eki ay múddette rentabelsiz mikroavtobus jónelislerinde kórilgen zıyanlardı qaplaw boyınsha mámleketlik xızmetlerdiń Ózbekstan Respublikası Birden-bir interaktiv mámleketlik xızmetler portalı (keyingi orınlarda - BIMXP) arqalı engiziliwin;

BIMXP arqalı kelip túsken arzalardı kórip shıǵıwdı "UzTrans" birden-bir interaktiv málimleme sisteması arqalı ámelge asırıw imkaniyatı jaratılıwın támiyinleydi.

Yaǵnıy,tasıwshılar rentabelsiz mikroavtobus jónelislerinde kórilgen zıyanlardı qaplap beriw ushın 2026-jıl 1-fevraldan baslap BIMXP arqalı múrájat etedi.

Rentabelsiz mikroavtobus jónelislerinde kórilgen zıyanlardı qaplawda talap etiletuǵın maǵlıwmatlardı (hújjetlerdi) kórip shıqqanı ushın jiyim óndirilmeydi.

Rentabelsiz mikroavtobus jónelislerinen kóriletuǵın zıyanlar, zárúr qarjılardı Qaraqalpaqstan Respublikası respublikalıq byudjetiniń parametrlerinde názerde tutqan halda, Qaraqalpaqstan Respublikasınıń respublikalıq byudjetiniń qosımsha dárekleri esabınan hár sherektiń juwmaǵı boyınsha subsidiya ajıratıw jolı menen qaplanadı.

"Qaraqalpaqstan Respublikasında, burınǵısınan basqasha tárizde, kommerciyalıq tiykarda jolawshılardı tasıw xızmetin kórsetetuǵın hám oǵan arnawlı ruxsatnaması (licenziyası) bolǵan yuridikalıq tárepler tárepinen qala átirapı yamasa qalalararalıq avtobus hám mikroavtobus jónelisinde zıyan muǵdarı 40 procentke shekemgi jónelis rentabelsiz jónelis esaplanadı";