Ózbekstan Respublikası Prezidentiniń 2026-jıl 17-aprel kúngi PQ-143-sanlı «Qaraqalpaqstan Respublikasında arnawlı mayning zonasın shólkemlestiriw hám onıń iskerligin jolǵa qoyıw is-ilájları haqqında»ǵı qararı qabıl etildi.

Qararǵa muwapıq:

         Qaraqalpaqstan Respublikası Ministrler Keńesiniń shólkemlestiriwshiliginde juwapkershiligi sheklengen jámiyet túrinde «Besqala mining Valley» arnawlı mayning zonasınıń direkciyası» shólkemlestiriledi hám Perspektivalı joybarlar milliy agentligi mayning iskerligin ámelge asırıw ushın ruxsatnamalar beriw boyınsha isshi uyım etip belgilenedi.

         Arnawlı zonanıń aymaǵı Qaraqalpaqstan Respublikasınıń pútkil aymaǵı bolıp esaplanadı; rnawlı zona sheńberinde tómendegilerge ruxsat beriledi:

- mayningti ámelge asırıw ushın birden-bir elektr energetika sistemasınan hám barlıq túrdegi qayta tikleniwshi energiya dáreklerinen, sonday-aq, vodorod elektr stanciyasında islep shıǵarılǵan elektr energiyasınan paydalanıwǵa;

- mayning nátiyjesinde alınǵan kripto-aktivler belgilengen tártipte milliy kripto-birjalar yamasa sırt el platformaları arqalı, sonıń ishinde, tikkeley shártnamalar tiykarında satılıwına hám (yamasa) olardı basqa likvidli kripto-aktivlerge almastırıwǵa;

- mayning nátiyjesinde alınǵan (sonıń ishinde, basqa likvid kripto-aktivlerge almastırılǵan) kripto-aktivlerdi satıwdan túsken túsimdi májbúriy túrde Ózbekstan Respublikasındaǵı banklerdiń esap betlerine ótkeriwge;

- tek ǵana Qaraqalpaqstan Respublikası aymaǵında mámleketlik dizimnen ótken hám jumıs alıp barıp atırǵan yuridikalıq shaxslar rezident bolıwına;

- Rezidentlerge mayningti ámelge asırıw nátiyjesinde payda bolatuǵın ıssılıq energiyası esabınan awıl xojalıǵına mólsherlengen jer uchastkalarında belgilengen tártipte ıssıxanalar shólkemlestiriwge ruxsat berilmekte.

2035-jıl 1-yanvarǵa shekem rezidentlerdiń mayning jumısın ámelge asırıw menen baylanıslı operaciyalardan alınǵan dáramatları salıqlar hám jıyımlardan azat etiledi. Rezidentlikke talabanlar (yuridikalıq shaxslar) arnawlı zona rezidentligin hám mayning jumısın ámelge asırıw ushın ruxsatnama alıw haqqındaǵı arza menen Direkciyaǵa múrájat etedi; talabanlardıń arzaları Direkciya tárepinen kórip shıǵıladı, unamlı juwmaq berilgen jaǵdayda

- talabanǵa Direkciya tárepinen arnawlı zona rezidenti statusı beriledi, rezidentke mayning jumısın ámelge asırıw ushın Agentlik tárepinen qosımsha hújjetler talap etilmesten ruxsatnama beriledi, Direkciya rezidentlerdi dizimnen ótkeredi, olardıń esabın júrgizedi hám arzalardıń sapalı kórip shıǵılıwı ushın juwapker boladı.

Bul qarardıń áhmiyetli tárepi Qaraqalpaqstan Respublikasınıń investiciyalıq tartımlılıǵın arttırıw hám jańa jumıs orınların jaratıw arqalı xalıqtıń dáramatların kóbeytiwden ibárat.

Qaraqalpaqstan Respublikası

hákimshilik sudınıń sudyası    K.Xojamuratov