Ózbekstan Respublikası Transport ministri Ilhom Mahkamov Pekinde bolıp ótken Turaqlı transport boyınsha global forumda qatnastı.

 Ilaj húkimetler, transport uyımları, xalıqaralıq shólkemler, ekspertler hám isbilermen toparlardıń joqarı mártebeli wákillerin xalıqaralıq transport baylanıslılıǵın rawajlandırıw, logistika shınjırlarınıń turaqlılıǵın támiyinlew, tarawdı sanlastırıw hám jańa texnologiyalardı engiziw máselelerin dodalaw ushın birlestirdi.

 Forumdaǵı shıǵıp sóylegen sózi dawamında Transport ministri Ilhom Mahkamov turaqlı transporttı rawajlandırıw, xalıqaralıq transport baylanıslılıǵın bekkemlew hám zamanagóy logistika sistemaların qáliplestiriw baǵdarında Ózbekstannıń tiykarǵı maqsetleri boyınsha pikir bildirdi.

 Ministr búgingi kúnde global támiynat shınjırlarınıń tereń ózgeriwi sharayatında transport tek ǵana járdemshi taraw emes, al jáhán ekonomikasınıń biyǵárez, strategiyalıq áhmietke ie sektor statusına aylanıp baratırǵanın atap ótti.

 Usı kózqarastan, Ózbekstan Qıtay tárepinen alǵa qoyılǵan global baslamalardı tolıq qollap-quwatlaytuǵının hám turaqlı transporttı rawajlandırıw bul baslamalardı ámeliy jaqtan júzege shıǵarıwdıń áhmietli baǵdarlarınan biri sıpatında kóretuǵının atap ótti.